د پوهنې وزارت مشرتابه او د نړیوال بانک (WB) استازو د اقرا پروژې پلي کیدو څیړلو په موخه لیدنه وکړه
پوهنې وزارت- کابل: د پوهنې وزارت مشرتابه په سویلي آسیا کې د نړیوال بانک ښوونې او روزنې مسئول او راغلو استازو د پوهنې په برخه کې د یاد بانک د پروژو پرمختګ او پلي کیدو څرنګوالي په موخه، په ځانګړي ډول د ښوونځیو جوړولو په برخه کې خبرې اترې وکړې.
دا لیدنه چې پوهنې وزارت کې تر سره شوه؛ پوهنې وزیر ډاکتر میرویس بلخي د ښوونې او روزنې په برخه کې د اقرا پروژو د ژر پلي کیدو غوښتونکی شو.
پوهنې وزیر ډاکتر بلخي ټینګار وکړ چې د ښوونځیو جوړولو او د ښوونیزو خدمتونو ښه والي په موخه اړتیا ده چې نړیوال بانک له مونږ سره ګام په ګام مخته ولاړ شي ترڅو په خپل وخت د یادو پروژو د پلي کیدو لیدونکي واوسو.
پوهنې وزیر همدارنګه د پوهنې،کلیو جوړولو او پراختیا وزارت او نړیوال بانک تر مینځ د یادو پروژو د ژر پلي کیدو په موخه د همغږي غوښتونکۍ شو.
په سویلي آسیا کې د ښوونې او روزنې لپاره د نړیوال بانک مسئول کرسیتین آئدو په دې لیدنه کې د اقرا پروژو د پلي کیدو د یو شمیر ننګونو د څرنګوالي تر څنګ ژمنه وکړه چې د ښوونې او روزنې په برخه کې به د یاد بانک پروژې په بریالیتوب سره تر سره شي.
د یادونې وړ ده چې د افغانستان ښوونې او روزنې پراختیا لپاره د نړیوال بانک له لوري ۲۹۸ میلیونه ډالره مرسته شوې چې د ښوونځيو جوړولو او د ښوونې او روزنې ښه والي په موخه به ولګول شي.
