د پوهنې وزارت د چارواکو د شتمنیو ثبت سیمینار
پوهنې وزارت_کابل: د یوې غونډې په ترڅ کې چې د پوهنې وزارت مشرتابه او رئیسانو په کې برخه اخیستې وه په داسې حال کې چې د شتمنیو څیړلو او ثبت ادارې استازو هم ګډون درلود، د معلوماتو وړاندې کولو او د پوهنې وزارت چارواکو د شتمنیو ثبت د ۱۱ پاڼه یي فورمو د ډکولو په اړه معلومات وړاندې شول.
په پیل کې د پوهنې وزارت مالي او اداري معین عبدالسبحان رؤف راغلو میلمنو ته د ښه راغلاست ترڅنګ، په روڼتیا او د فساد پروړاندې په مبارزې د ټینګار ترڅنګ، د چارواکو د شتمنیو ثبت کول یې د دموکراسي پلي کولو په لاره کې یوه ګټور ګام یاد کړ او له چارواکو څخه یې وغوښتل چې په دې موخه فورمې په سمو معلومات ډکې کړي.
ورپسې د شتمنیو ثبت او څیړلو ادارې استازي بریالي باوري د پوهنې وزارت له همکارۍ څخه ستاینه وکړه او یاده یې کړه چې یاده اداره د روڼتیا ساتنې او د فساد پروړاندې د مبارزې په برخه کې د پوهنې وزارت سره اوږد مهاله همکاریو ته ژمن دۍ.
ورپسې د عامه پوهاوي کارپوه احمدصفا رزمنده، د خپراوي کارپوه رامین مظهر، د شتمنیو د ثبت او تحلیل کارپوه احسان الله زیرک او د یادې ادارې یو شمیر نورو کارکوونکو د یادې موضوع او فورمو ډکولو په تړاو خبرې وکړې.
د یادونې وړ ده چې د شتمنیو د ثبت او څيړلو اداره په ۱۳۸۷ لمریز کال کې د اساسي قانون د اوومې، پنځوسمې او د ۷۵، ۱۵۴ مادو د دریمو برخو پر اساس مینځ ته راغلې ده او د روڼتیا ساتنې او د اداری فساد مخنیوي په موخه شخصي، منقولې او غیر منقولې شتمنۍ او ملکیتونه د یادې ادارې په فورمو کې ثبت کیږي.
