بلخ ولایت کې یوه ښوونځي ته ودانۍ جوړه شوه
بلخ ولایت کې د مولانا جلال الدین محمد بلخي د هلکانو ښوونځي ته نوې ودانۍ جوړه او ګټې اخیستنې ته وسپارل شوه، یاده ودانې چې ۱۶ ټولګي لري د ترکیې هیواد د تیکای ادارې له لوري جوړه شوې ده.
د یاد ښوونځي پرانیستغونډه کې د پوهنې رئیس او کارکوونکو، د ولایتي شورا رئیس ډاکټر محمد حدید، د یاد ښار ښاروال توفیق امیني، د ترکیې هیواد سرکنسل، یو شمیر ښوونکو، زده کوونکو او د سیمې اوسیدونکو ګډون درلود.
د بلخ د پوهنې رئیس علي امیري میلمنو ته د ښه راغلاست ویلو ترڅنګ، د ترکیې هیواد او تیکای ادارې له مرستو مننه وکړه او وې ویل: د متوازنو تعلیمي چوپړتیاو وړاندې کول د پوهنې وزارت له لومړيتوبونو څخه دي او زموږ هڅه دا ده چې د خوندي چاپیریال په جوړولو سره، د زده کوونکو لپاره اړینې ښوونیزې آسانتیاوې برابرې کړو.
وروسته د ولایتي شورا رئیس ډاکټر محمد افضل حدید، د افغانستان او ترکیې هیواد د ملګرتیا په تاریخي بهیر خبرې وکړې او د دې هیواد له هراړخیزو مرستو یې مننه وکړه.همداراز نوموړي له زده کوونکو غوښتنه وکړه څو د ښوونځي ودانۍ او د ښوونځي د نورو توکو ساتنې ته پاملرنه وکړي.
