پوهنې وزارت کې د ماشوم نړيواله ورځ ولمانځل شوه
د ماشوم نړيواله ورځ، د پوهنې وزارت سرپرستې آغلې رنګينې حميدي، د عامه اړيکو او پوهاوي رئيسې آغلې ليلا ساماني، ځينې مرکزي رئيسانو، ماشومانو او د کودکستان د ښوونکو په ګډون سره، د پوهنې وزارت انګړ کې ولمانځل شوه.
د پوهنې وزارت سرپرستې ميرمن رنګينې حميدي د ماشوم د نړيوالې ورځې په پار د هيواد ټولو ماشومانو او په ځانګړي ډول د ياد وزارت د وړکتون ماشومانو او د هغوى ميندو ته مبارکي ورکړه، په ډاکه يې کړه: د نن ورځې ماشومانو د سبا جوړونکي او رهبران دي.
نوموړې زياته کړه، د هيواد ولسمشر او د پوهنې وزارت رهبري ژمنه ده چې د هيواد د بچيو په روزنه کې به هر ډول هلې ځلې کوي او هڅه کوي چې د ښوونې او روزنې برخه کې د نويو طرحو په پلي کولو سره، د هيواد هر ماشوم په راتلونکي کې يو ځوان علمي کادر اوسي، څو په راتلونکي کې ه هيواد په آبادۍ او ښيرازۍ کې خپل فردي او ملي دنده پر ځاى کړي.
د غونډې په ترڅ کې ياد ماشومان د آغلې رنګينې حميدي لخوا د ډاليو په ورکړې سره ونازول شول.
په پاى د پوهنې وزارت د وړکتون يوې ښوونکې د ياد وړکتون د ښوونکو په استازولي د موضوع اړوند خبرې وکړې او د پوهنې وزارت له مشرتابه يې مننه وکړه چې وړکتون او د ماشومانو روزنې ته پاملرنه کوي.
