له افغانستان څخه دپخواني شوروي اتحاد د پوځيانو د وتلو او ماتې د ۳۳ کلیزې په مناسبت د پوهنې وزارت د سرپرست وزیر پیغام
الحمدلله رب العلمین، والصلوة والسلام علی خیر خلقه محمد وعلی آله و اصحابه اجمعین.امابعد:
درنو هیودوالو !
السلام علیکم و رحمة الله و برکاته
تر هرڅه نه وړاندې له ګران هیواد افغانستان څخه د پخواني شوروي اتحاد د پوځيانو د وتلو او ماتې د ۳۳ مې کلیزې په مناسبت درته د مبارکي مراتب وړاندې کوم .
دا یو تاریخي حقیقت دی، چې په ګران هیواد باندې د پخواني شوروي اتحاد ظالمانه یرغل زمونږ د ټولنې ټول بنسټونه په تیره بیا د هیواد تعلیمي نظام سخت وځاپه، په زرګونو ښوونکي، زده کوونکي او علمي کدرونه شهیدان شول، زندانونو ته واچول شول، له هیواد څخه هجرت ته اړ ایستل شول، د هیواد دیني مدارس، ښوونځي او علمي مراکز په مادي او معنوي لحاظ وران ویجاړ کړای شول، د ښوونځیو تعلیمي نصاب خپله دیني او ملي صبغه له لاسه ورکړه او د سوسیالیزم خرافاتي محتویات پکې داخل کړای شول .
خو د افغان مجاهد ولس د یوې لسیزې ویاړلې مبارزې په پایله کې روسي پوځونه له هیواد څخه وتښتیدل او ۳۳ کاله وروسته یرغلګره امریکا هم د پخواني شوروي اتحاد په سرنوشت اخته شوه او په هیواد کې له زیاتې مودې وروسته یو مرکزي، یوموټی او اسلامي نظام حاکم شو.
له همدې طلايي فرصت څخه په استفادې سره اسلامي امارت په تیره بیا د پوهنې وزارت متعهد دی، چې د هیواد ځپل شوی تعلیمي نظام بیرته فعال کړي، ترڅو د تعلیم او تربیې په واسطه یوه سالمه او دیني معتقداتو او ملي ارزښتونو ته ملتزمه ټولنه را منځ ته شي. داسي یوه ټولنه چې په مادي او معنوي لحاظ له ځان او هیواد څخه د دفاع وړتیا ولري او د انګریزانو، روسانو او امریکایانو په څير یرغلګر پوځونه ورباندې بیا د یرغل جرئت ونه کړي.
ان شاءالله.
والسلام
شیخ القرآن والحدیث الحاج مولوي نورالله «منیر»
دپوهنې وزارت سرپرست وزیر
