په لوګر او فاریاب ولایتونو کې د دیني مدرسو زده کوونکو ته د درسي کتابونو وېش پیل شو
د فاریاب ولایت د پوهنې رئیس مولوي سید حفیظ الله معتصم بالله او د دې ولایت د مدرسو او دارالعلومو د مسوولینو او ښوونکو په ګډون، د ولایت د مدرسو او دارالعلومو پر زده کوونکو باندې درسي کتابونه وویشل شول.
د پوهنې رئیس په وینا؛ ۷۹ عنوان کتابونه چې ټول ټال ۷۲۲۱۷ ټوکه کېږي، د مدرسو د ادارو له لارې پر زده کوونکو باندې ویشل کیږي.
د لوگر له ولایت څخه د یو بل خبر له مخي:
په لوګر ولایت کې په موجودو ۳۰ دیني مدرسو، دارالحفاظونو او دارالعلومو کې د درسي کتابونو د وېش بهیر رسماً پیل شو.
یاد بهیر د پوهنې ریاست په لارښوونه پیل شو، چې په ترڅ کې به یې د پوهنې وزارت ۶۴۶۵ ټوکه نوي را لېږل شوي درسي کتابونه ووېشل شي.
په دې درسي کتابونو کې، له څلورم څخه تر دولسم ټولګي پورې د پوهنې وزارت د تعلیمي نصاب اړوند دیني او عصري کتابونه شامل دي.
