په افغانستان کې د ناروي هیواد سفیر د پوهنې وزارت له سرپرست وزیر سره وکتل

 په افغانستان کې د ناروي هیواد سفیر اول لیندمن (0LE LINDEMAN) او ورسره مل هیئت یې چې په ترکیب کې یې د یاد هیواد د بهرنیو چارو په وزارت کې د سولې او پخلاینې د څانګې مشره میرمن سیري بورجن (SIRI BORGEN)، په قطر هیواد کې د ناروي د سفارت کارکوونکې میرمن اني هیون (ANNE HAVN) او د یاد هیواد بهرنیو چارو د وزارت د امنیتي پالیسي د څانګې مسئول جینز اوډګارډن(JENS ODEGAARDEN)  شامل وو، د پوهنې وزارت د مقام په دفتر کې د یاد وزارت له سرپرست  وزیر شیخ مولوي نورالله  منیر صاحب  سره  وکتل.
په یاده لیدنه کې د ناروي هیواد سفیر وویل،  چې دی افغانستان ته  د همکاري او ملاتړ له پیغام سره راغلی دی، د نوموړي په وینا، د افغانستان له ښوونیز بهیر سره مرسته د ناروي هیواد  په لومړیتوبونو کې ده.
د پوهنې محترم وزیر صاحب  د ناروي هیواد له سفیر څخه مننه وکړه او زیاته یې کړه، چې یاد  هیواد تل د افغانستان  یو غښتلی متحد  پاتې شویدی. د نوموړي په وینا، د اسلامي امارت تعلیمي پالیسي داده،  چې د هیواد هر وګړی له ښوونې او روزنې څخه بې برخې پاتې نه شي او په دې برخه کې نړیواله ټولنه هم مسئولیت لري چې افغانستان  یوازې پرېنږدي.