له ننګرهار او کندهار ولایتونو څخه د پوهنې لنډ خبرونه
ننګرهار:
د ننګرهار ولايت د پوهنې رئيس مفتي حبيب حضرت حقاني د ننګرهار په درونټې سیمه کې د بي بي مريم له لېسې په سرخرود ولسوالۍ کې د يو شمېر نورو ښوونځيو له اداري، تدريسي، کتابتونونو، لابراتوارنو او نورو برخو څخه ليدنه وکړه. نوموړي له مسوولینو څخه د دوی د ښو فعالیتونو له امله مننه وکړه.
د ننګرهار ولایت د ګوشتې ولسوالۍ د کروندې لومړني ښوونځي د بیارغاونې د چارو د پیل په مناسبت د پوهنې ریاست د مسوولینو، د سویډن کمیټې د استازو، د سیمه ییزو ادارو د مسوولینو او د سیمې د اوسیدونکو په ګډون غونډه جوړه شوه. ولسوالی ویل کیږي چې د دې پروژې ټول لګښت د سویډن کمیټې لخوا ورکول کیږي.
د ننګرهار د والي وياند فرهاد احمد ستانکزي د دغه ولايت له يوې خصوصي راډيو سره په ځانګړې مرکه کې د دغه ولايت د پوهنې رياست په ځانګړي ډول د ننګرهار د پوهنې رئيس مفتي حبيب حضرت حقاني د خدمتونو او هڅو يادونه وکړه. نوموړي په دغه ولايت کې د پوهنې د پرمختګ په برخه کې د ننګرهار ولايت په ټولو برخو په ځانګړي ډول په لرو پرتو سيمو کې د دغه ولايت د پوهنې رياست د رهبرۍ لاسته راوړنې د پاملرنې وړ وبللې.
کندهار:
د کندهار ولایت د معروف ولسوالۍ د پوهنې آمریت په انګړ کې د پوهنې د مسوولینو، دیني عالمانو او د سیمې خلکو په ګډون د علم د زده کړې او ارزښت په موخه غونډه جوړه شوه.
د دې ولسوالۍ د پوهنې آمر مولوي محمود احرار د غونډې له ګډونوالو وغوښتل، چې خپل اولادونه زده کړو ته په هڅولو سره خپل راتلونکی روښانه کړي.
د کندهار ولایت د پنجوايي ولسوالۍ د پوهنې آمر د دیني مدارسو د مسوولینو د همغږۍ غونډه د مولوي محب الله سعادت تر څارنې لاندې جوړه شوه.
ښاغلي سعادت په دې ولسوالۍ کې د زده کوونکو د کمیت او د پوهنې د کیفیت په اړه د خبرو پرمهال د غونډې ګډونوال مکلف وګڼل چې خلک وهڅوي چې خپل اولادونه د علم زده کړې لپاره ښوونځیو او مدارسو ته واستوي.
همدارنګه:
د کندهار ولايت د پنجوايي ولسوالۍ د پوهنې آمر د شمس الدين کاکړ له لېسې، حاجي ګلون بابا له لومړني ښوونځي، د امام بخاري او غرګيانو د مدارسو له تدريسي او اداري چارو څخه څارنه وکړه او د يادو ادارو له مسوولينو يې د لا زياتو خدمتونو غوښتنه وکړه.
