له ولایاتو څخه د پوهنې لنډ خبرونه
هرات:
مولوي عبدالله امیني د هرات ولایت د ښار د پوهنې له ۲۰۰ ښوونکو سره د لیدنې پر مهال د هېواد د ښه والي او پرمختګ کې د ښوونکو د رول په اړه خبرې وکړې او له هغوی یې وغوښتل چې د هېواد د بچیانو د زده کړې په برخه کې لا زیاتې هڅې وکړي.
کندز:
د کندز ولایت له عمریه جهادي مدرسې څخه ټولټال ۱۳۴ تنه د حدیثو له ۸ میاشتني دورې څخه فارغ شول.
د فراغت په مراسمو کې ويناوالو فارغانو ته د مبارکۍ ترڅنګ له هغوى څخه وغوښتل چې ديني ښوونې په خپل ژوند کې معیار وګرځوي.
کندهار
د کندهار ولايت د ډنډ ولسوالۍ د پوهنې آمر مولوي نيک محمد نقشبندي د دې ولسوالۍ د رمباسي کلي له مشرانو، د خلکو له استازو او مخورو سره د يوې ديني مدرسې د جوړېدا په باب خبرې او مشورې وکړې.
سرپل:
د دې ولایت د پوهنې ریاست د مرکز ساینس د ښوونکو له خوا د سرپل ولایت د سوزمه قلعه ولسوالۍ د پوهنې آمریت ۴۱ آمرینو، مدیرانو، د څارنې غړو او ۷۰ تنو د ښوونځیو ښوونکو ته د میتودولوژۍ او مدیریت په برخه کې شپږ ورځنی روزنیز ورکشاپ جوړ شو.
پکتیکا:
د پکتیکا ولایت د اسلامي زده کړو آمر مولانا افضلي د امیري خیریه بنسټ له مسوول خان محمد امیري سره د دې ولایت له مرکزي یتیم خانې څخه لیدنه وکړه.
د امیري بنسټ مسوولینو د زده کوونکو د ژوند د وضعیت له ارزونې او هغوی ته د خدمتونو د وړاندې کولو په موخه ژمنه وکړه، چې د دغه یتیم خانې زده کوونکو ته به د ګرمو اوبو او ژمنیو جامو په برابرولو کې مرسته وکړي.
