د پوهنې وزارت د څلورم ستراتیژیک پلان د جوړولو کار پیل شو
د پوهنې وزارت د څلورم ستراتیژیک پلان د پرمختیا په تړاو غونډه د پلان د رئیس مولوي حبیب الله آخندزاده او د پلان جوړونې ادارې د یو شمېر مهمو غړو او مسوولینو په ګډون جوړه شوه.
غونډه د قرانکریم د مبارکو آیاتونو په تلاوت سره پیل شوه، ورپسې د پلان رئیس مولوي حبیب الله آخندزاده د یاد شوي پلان ارزښت ته اشاره وکړه او ویې ویل: موږ باید د دغه وزارت له نورو څانګو او ادارو سره په پوره همغږۍ او اخلاص کار وکړو. ځکه چې د هرچا د امید سترګي موږ ته دي، ترڅو د پوهنې وزارت لپاره داسې بشپړ ستراتیژیک پلان جوړ کړو، چې د پوهنې وزارت ټولې ستونزې د کمیت او کیفیت له مخې پکې هوارې شي .
ورپسې د یادې ادارې یو تن مسوول جاوید احمدي د پوهنې د څلورم ستراتیژیک پلان په اړه خبرې وکړې او زیاته یې کړه: څلورم ستراتیژیک پلان باید د ټولنې له ښوونیزو او روزنیزو اړتیاوو سره سم چمتو شي او د پوهنې په برخه کې باید پرمختګ وشي، ترڅو موږ وکولای شو، چې د پوهنې په برخه کې د پام وړ خدمتونه وړاندې کړو.
د غونډې په جریان کې نورو ګډونوالو هم د ارقامو د راټولولو په برخه کې او د موضوعاتو د جوړښت او د یاد شوي پلان د بډاینې په اړه خپل نظریات وړاندې کړل.
