د کندهار او لغمان له پوهنې ریاستونو څخه لنډ خبرونه
لغمان
د لغمان والي الحاج قاري زین العابدین عابد او د دې ولایت د پوهنې له رئیس مولوي شاه جهان ساجد سره یو ځای د معروف خیلو له دیني مدرسې څخه لیدنه وکړه، د زده کوونکو تدریسي بهیر د ارزونې په ترڅ کې یې او د یادې مدرسې اداري او تدریسي چارې مثبتې وارزولې او له مسوولینو څخه یې وغوښتل، ترڅو د زده کوونکو د سالمې ښوونې او روزنې په برخه کې لا هڅي وکړي.
په لغمان ولایت کې د یونیسف سیمه ییز دفتر د سلطان غازي او مهترلام بابا د ښوونځیو لپاره ۳۰۰ پایې میزونه او څوکۍ مرستې وکړې.
د دغه ولايت د پوهنې رياست مشرتابه د يادې شوې ادارې له مرستو څخه د مننې ترڅنګ زياته کړه: د دې مېزونو او څوکيو د په ورکړې سره به د يادو دوو ښوونځيو د زده کوونکو ستونزې په بشپړ ډول هوارې شي.
نور خبرونه
د لغمان ولايت د پوهنې رئيس مولوي شاه جهان ساجد د دغه رياست په انګړ کې د نيالګيو په ايښودلو سره د دغه ولايت په ښوونيزو او روزنيزو مرکزونو کې د نيالګيو د ايښودلو کمپاين پيل کړ او د پوهنې له ټولې کورنۍ يې وغوښتل،ترڅو يو نيالګی د ځان لپاره او یو نیالګی د هېواد د سمسورتیا لپاره په خپلو شاوخوا کرنیزو سیمو کې وکري.
کندهار
د کندهار ښار د تعلیمي څارنې آمر حافظ مولوي محمد عثمان روحاني د دغه ولایت د خیرآباد لېسې له تدریسي، اداري، لابراتوار او کتابتون څخه لیدنه وکړه او د ښوونې او روزنې په برخه کې یې د استادانو او مسوولینو کړنې وستایلې.
د یو بل خبر له مخې
د کندهار ولايت د پنجوايي ولسوالۍ د پوهنې آمر مولوي مجيب الله سعادت د دې ولسوالۍ د مدارسو او ښوونځيو له مسوولينو سره غونډه وکړه.
لومړی یې د ګډونوالو ستونزې او شکایتونه واورېدل او بیا یې د کارکوونکو په ورځنيو چارو کې د اصولي کړنو، ښه چلند او اخلاص په اړه خبرې وکړې.
