له ولایتونو څخه د پوهنې خبرونه
غزني
د غزني پوهنې ریاست د یونیسف د سیمه ییز دفتر په مرسته د دغه ولایت په مرکز او ولسوالیو کې ښوونځیو ته د خیمو، ښوونیزو، روغتیايي او ورزشي کڅوړو د وېش لړۍ پیل کړې ده.
د غزني د پوهنې رئيس مولوي ميرنصير احمد حسيني د يونيسف له دوامدارو مرستو څخه مننه وکړه.
د یو بل خبر له مخې
د غزني ولایت د ګیلان ولسوالۍ د تعلیمي څارنې آمر مولوي نعمت الله شاکر له مل پلاوي سره د شینکۍ له منځني ښوونځي څخه لیدنه وکړه.
په دې کتنه کې نوموړي د پوهنې ریاست د اداري اسنادو ترڅنګ د پوهنې ریاست روزنیز پلانونه او پروګرامونه و ارزول او د شته نیمګړتیاوو د له منځه وړلو په موخه یې د ښوونځي مدیر او ښوونکو ته لازمې لارښوونې او مشورې وکړې.
بدخشان
د بدخشان د پوهنې ریاست سکتوري غونډه د دغه ولایت د پوهنې رئیس مولوي محراب الدین اقبال تر څارنې لاندې د اطلاعاتو فرهنګ، کلیو پراختیا، اقتصاد، تخنیکي او مسلکي زده کړو، المپیک یاستونو او د مرستندویو بنسټونو د استازو په ګډون جوړه شوه.
د بدخشان پوهنې رئيس د پوهنې په برخه کې د مرستندویو بنسټونو له مرستو څخه مننه وکړه او له هغوى يې وغوښتل چې د دغه ولايت د پوهنې له رياست سره د پوهنې وزارت له اصولو او شویو هوکړه لیکونو سره سم مرستې وکړي.
د پوهنې په برخه کې د مرستندویو بنسټونو مسوولینو هم د غونډې ګډونوالو ته د خپلو فعالیتونو د وړاندې کولو په ترڅ کې د پوهنې په برخه کې د خپلو اوږدمهالو همکاریو په باب معلومات ورکړل.
هلمند
د هلمند ولایت د پوهنې رئیس مولوي محمد عوض انصاري او ورسره مل پلاوي د دغه ولایت په مرکز لښکرګاه ښار کې د عبدالصمد روحاني لېسې له اداري او تدریسي چارو څخه د څارنې ترڅنګ د یاد ښوونځي له کتابتون، لابراتوارخوني او ګدام څخه هم لیدنه وکړه.
کاپیسا
د کاپیسا ولایت د پوهنې ریاست د ښوونې او روزنې آمر استاد خان آغا هارون د عبدالمبین شهید لېسې د تدریسي او اداري چارو څخه څارنه وکړه، استادان یې وهڅول، چې د هېواد بچیانو ته په سمه توګه زده کړې ورکړي او پر زده کوونکو یې غږ وکړ، چې د زده کړو د ترلاسه کولو لپاره هلې ځلې وکړي.
