له ولایتونو څخه د پوهنې خبرونه
بلخ
د بلخ ولایت د پوهنې رئیس الحاج مولوي عبدالجلیل شهیدخېل د دغه ولایت د ۲۵ خصوصي مدارسو له مسؤلینو سره وکتل او د پوهنې وزارت د ښوونیز نصاب د عملي کولو په باب یې ورسره خبرې وکړې.
په دې غونډه کې د پوهنې رئیس په هېواد کې د دیني مدارسو لپاره د ښوونکو د سل زره نویو بستونو د منظورۍ یادونه وکړ.
له همدې ریاست څخه یو بل خبر؛
په مزارشريف ښار کې د غلام محمد ميمنې لېسې د ښوونکو لپاره د ښوونکو د مسلکي ودې د آمریت له لوري د ښوونکو د ظرفيتونو د لوړولو په اړه يو سيمينار جوړ شو.
له همدې ولایت څخه یو بل خبر
د بلخ ولایت له مرکز او د مارمل، حیرتان او شور تپې ولسوالیو له ښوونځیو څخه راپورونه وايي، چې د پوهنې مسئولینو په اړوندو ښوونځیو کې د یونیسف د سیمه ییز دفتر له خوا مرسته شوي درسي کتابونه، قرطاسیه او نور ښوونیز توکي وېشلي دي.
ارزګان
په ارزګان ولایت کې د پوهنې ریاست د اسلامي زده کړو آمریت د دیني مدارسو د ښوونکو د خالي بستونو د ډکولو په موخه د له ۱۲۷ تنو نوماندانو څخه ازموینه واخیسته.
د دوی په وینا؛ له دې جملې څخه ۶۰ تنه هغه نوماندان چې معیاري نمرې ترلاسه کوي، په پام کې ده چې د ارزګان د مرکز او ولسوالیو په دیني مدارسو کې د ښوونکو په توګه وګمارل شي.
غزني
په غزني ولایت کې د دعوت او ارشاد مسئولینو د دغه ولایت د پوهنې له رئیس مولوي میرنصیر احمد حسیني سره وکتل او د دوی د فعالیتونو په برخه کې یې پر یو لړ ستونزو خبرې وکړې او د حل غوښتنه یې وکړه.
د غزني ولايت د پوهنې رئيس له يادې ادارې سره همکاري له خپلو مسئوليتونو څخه وګڼله او د هر ډول مرستو ژمنه یې ورسره وکړه.
