د پوهنې وزارت د دارالعلومونو رئیس د کابل ولایت له امام ابو حنیفه(رحمة الله علیه) له دارالعلوم څخه لیدنه وکړه
د پوهنې وزارت داسلامي زده کړو معینیت د دارالعلومونو رئيس مولوي عبدالقدوس قدوسي په مشرۍ یو لوړ پوړي پلاوي، په داسې حال کې چې يو شمېر علماوو او مسؤلينو يې هم ملتيا کوله، د کابل ولایت له امام ابو حنیفه(رحمة الله علیه) دارالعلوم څخه ليدنه وکړه.
د دارالعلومونو رئیس د یاد دارالعلوم ښوونیز وضعیت له نیږدې وڅېړه او له مسئولینو او زده کوونکو سره یې د هغوی د فعالیتونو د پرمختګ، درسي پلانونو، نیمګړتیاوو او ننګونو په اړه تفصیلي خبرې وکړې.
نوموړي له زده کوونکو وغوښتل، چې د استادانو درناوی وکړي او د یاد ښوونیز بنسټ د کتابونو او وسایلو څخه ساتنه وکړي.
د کتنې په دوام د پوهنې وزارت پلاوي د مسئولينو او زده کوونکو وړانديزونه، نظريې او ستونزې واورېدې او د حل ژمنه يې وکړه.
په پای کې یاد پلاوي، له درسي خونو، اداري خونو او د زده کوونکو لیلیې څخه هم لیدنه وکړه او د وضعیت د لاښه والي په موخه یې، مسئولینو ته لازمې لارښوونې وکړې.
