د هېواد مدارسو لپاره د پوهنې وزارت د اسلامي زده کړو معینیت د بستونو وېش کمېټې کاري غونډه وکړه
د پوهنې وزارت د اسلامي زده کړو معین الحاج مولوي کرامت الله آخندزاده په مشرۍ د دیني مدارسو لپاره د بستونو د وېش کمېټې مشورتي غونډه، په داسې حال کې چې د سرچینو او اداري معین مولوي صبغت الله وصیل او د یاد وزارت د اسلامي زده کړو معینیت د استعدادونو د ارزونې رئیس مفتي عبدالولي سداد پکې ګډون درلود، جوړه شوه.
په پيل کې د پوهنې وزارت د سرچینو او ادارې معین د هېواد دیني مدارسو لپاره د بستونو د وېش د معیارونو په اړه خبرې وکړې او په یاده برخه کې یې د مسئولینو د پاملرنې غوښتنه وکړه، تر څو د مدارسو اړتیاوو ته په کتو سره لازم تصمیمونه ونیول شي.
ورپسې د پوهنې وزارت د اسلامي زده کړو معین د اسلامي زده کړو بنسټونو لپاره د خالي بستونو پر ځانګړي کولو ټینګار وکړ او مسئولینو ته یې لازمې لارښوونې وکړې.
غونډه د لازمو تصمیمونو په نیولو سره پای ته ورسېده.
