د ځينو ولایتونو له پوهنې ډګره لنډ خبرونه
پروان
د پروان ولایت د پوهنې نوی رئیس سید محمد فیضي د یو لړ مراسمو په ترڅ کې، د ياد ولایت د مقام مرستیال مفتي محمد ادریس انوري له لوري، د پوهنې ریاست کارکوونکو ته وروپېژندل شو.
د ياد ولايت د پوهنې نوي رئيس د ا.ا.د عالي مقام د مشرتابه او د پوهنې وزارت له باور څخه د مننې ترڅنګ ژمنه وکړه، چې د پروان ولایت ماشومانو ته به د زده کړو د آسانتياوو برابرولو او په دغه ولایت کې د ښوونيز نظام لاښه والي لپاره هلې ځلې وکړي.
هرات
د هرات ولایت پوهنې رئیس مولوي رحمت الله جابر، د ياد ولایت د دولتي او خصوصي ښوونځیو د آمرينو او مدیرانو په ګډون سره غونډه جوړه کړه.
د غونډې پر مهال په تېر ښوونيز کال کې د پوهنې ریاست د لاسته راوړنو او ستونزو د ارزونې ترڅنګ، په دغه ولایت کې د راتلونکي ښوونيز کال لپاره د نویو تعلیمي او اداري پلانونو د پلي کولو او د یو لړ بېلابېلو موضوعاتو په اړه لکه: اطاعت او مسئولیت، په ښوونځیو کې د ښوونيز وضعیت لاښه والي، د خیالي زده کونکو له شمېرلو مخنيوی، د سويي آزموینې اخیستلو، وړتیاوو او شرطونو په تړاو بحثونه ترسره او اړين تصميمونه ونيول شول.
ارزګان
د اروزګان ولایت د پوهنې رئیس الحاج مولوي شمس الله آخندزاده کامران د ياد ریاست له آمرينو او مدیرانو سره د لیدنې پر مهال، د دغه ریاست د تیر یو کال لاسته راوړنو، کړنو او ستونزو په اړه خبرې وکړې او د پوهنې ریاست د کارکوونکو له صادقانه هڅو څخه يې ستاینه وکړه.
خوست
د خوست والي مولوي بسم الله عبدالله د ياد ولایت د پوهنې له نوي رئیس مولوي فیض الله جمال سره د لیدنې پر مهال، د دغه ولایت د پوهنې د وضعیت په اړه د خبرو ترڅنګ،د پوهنې ریاست سره د هر ډول همکارۍ ژمنه وکړه.
په پاى کې د خوست پوهنې رئيس د ياد ولايت د والي له ورتګ څخه هرکلى وکړ او د پوهنې په برخه کې يې د نوموړي له ملاتړ ستاينه وکړه.
سرپل
د سرپل ولايت د علماوو شورا شرعي مشورتي غونډه، د ياد ولايت د پوهنې په رياست کې جوړه شوه.
په هغه غونډه کې چې د پوهنې ریاست مشرتابه او جيدو علماء کرامو پکې حضور درلود، هر یو په خپل وار خبرې وکړې او د پوهنې د لا ښه والي په موخه یې خپل نظریات وړاندې کړل.
