د راستنېدونکو کډوالو زده کونکو څخه د سويې د تثبيت آزموینه واخيستل شوه
د کابل ولایت پوهنې ریاست په یوه خبرپاڼه کې ویلي، چې له پاکستانه راستانه شويو ۳۰ تنو هېوادوالو څخه د هغوی د سويې د تثبیت په موخه آزموینه واخيستل شوه.
د دوی په وينا، په پام کې ده، چې د سويې کچې تر معلومېدلو وروسته، ياد زده کوونکي خپلو کورونو ته نيږدې ښوونځيو کې شامل شي، تر څو خپلو زده کړو ته دوام ورکړي.
د کابل ولایت پوهنې رئیس الحاج مولوي عبدالحق حقاني په داسې حال کې چې د پوهنې ریاست مسئولینو، استادانو او یو شمېر علماوو هم حضور درلود، وويل چې د پوهنې وزارت د خپلې تګلارې له مخې، ټولو هېوادوالو ته د ښوونیز چوپړونو وړاندې کول له خپلو بنسټيزو دندو څخه ګڼي او ياد وزارت ژمن دی، تر څو د هېواد په ټولو برخو کې د ځوانانو لپاره د زده کړو آسانتیاوې برابرې کړي.
همدارنګه نوموړي په آزموينه کې د روڼتيا ډاډ ورکړ.
له بلې خوا يو تن زده کوونکي د نورو په استازيتوب د هېواد د راستنېدونکو ځوانانو لپاره د زده کړو د آسانتياوو برابرولو په برخه کې د پوهنې وزارت د مشرتابه له هڅو څخه مننه او قدرداني وکړه.
