په لوګر ولایت کې د ۸ بابه ښوونځیو بیارغونې چارې بشپړې شوې
د لوګر ولایت پوهنې رئیس الحاج مولوي عبدالرحمن حمیدي، د یو لړ مراسمو په ترڅ کې چې د یاد ریاست مسئولینو، یو شمېر علماوو او د خلکو استازو پکې ګډون درلود، په دغه ولایت کې د ۸ بابه ښوونځیو ودانۍ ګټې احیستنې ته وسپارلې.
ياد ښوونځي د دغه ولايت په مرکز پل علم او چرخ ولسوالۍ کې موقعيت لري، چې ټولټال پرې ۱۴ مېلیونه افغانۍ لګښت راغلی دی.
د همدغو ښوونځیو بيارغونې او تجهيزاتو د پروژو لګښت د پوهنې په برخه کې د يو همکار بنسټ لخوا تمويل شوى دى.
یاد ښوونځي د اړینو ملحقاتو سربېره په لمریزه برېښنایي انرژۍ هم سمبال دي.
د لوګر پوهنې رئیس په خپلو خبرو کې له خلکو وغوښتل چې د پوهنیز نظام سره خپلو مادي او معنوي همکاریو ته دوام ورکړي او خپل ماشومانو مدارسو او ښوونځيو ته واستوي.
ويناوالو او د زده کوونکو والدينو د هېواد ماشومانو د پوهنې ودې او پرمختګ په برخه کې د پوهنې مسئولينو له پاملرنې څخه خوښي څرګنده کړه.
