د پوهنې وزارت سرپرست په بلخ ولایت کې د ښوونیزو بنسټونو یو شمېر پروژې پرانیستلې
![25656](/sites/default/files/2024-07/452319882_461561916871737_1381579039879634596_n.jpg)
د پوهنې وزارت سرپرست الحاج مولوي حبیب الله آغا چې د بلخ ولایت د پوهنیز وضعیت په لیدنې او ارزونې بوخت دی؛ د ښوونیزو بنسټونو د ودانیو پرانیستلو په لړ کې، نن یو شمېر نورې پروژې هم پرانیستلې:
١_د بلخ ولايت دهدادي ولسوالۍ اړوند د قلعه جنگي عالي لېسې د ودانۍ رغونه، چې لګښت یې ٢١ مېليونه ١٦٥ زره ٣٢٠ افغانۍ اټکل شوی دی.
٢_ د دولت آباد ولسوالۍ د رابعه بلخي لېسې د ودانۍ بیارغونه، چې ۳ مېليونه ٥٩٤ زره ٥٧٠ افغانۍ لګښت پرې راځي.
۳-- د بلخ عالي دارالعلوم د ودانۍ بنسټ ډبره اېښودل، چې په پام کې ده، د ۵ مېلیونه افغانیو لګښت سره جوړه شي.
د يادونې وړ ده، تر دې وړاندې د پوهنې وزارت د سرپرست له خوا د«حنیفه البیضاء» مدرسې ودانۍ هم پرانيستل شوې وه، چې څه باندې ۱۱ مېليونه افغانۍ لګښت پرې راغلى و.
د پوهنې وزارت سرپرست د پورتنیو پروژو د پرانیستې پرمهال، د ټولنې په پرمختګ او سمون کې د پوهنې ارزښت ته اشاره وکړه او ویې ویل: په پوهنیز نظام کې کمیت او کیفیت یو له بل سره لازم او ملزوم دي او موږ په دې برخه کې خپلو جدي هڅو ته دوام ورکوو.
د يادونې وړ ده، چې یادې پروژې د پوهنې همکارو بنسټونو له خوا تموېلیږي.
همدارنګه تېره ورځ هم په بلخ ولايت کې د پوهنې وزارت سرپرست له لوري د يو شمېر مدارسو او ښوونځيو ودانۍ پرانيستل شوې، چې په یاد ولایت کې د پروژو ټولیز شمېر ۹ بابه مدارسو او ښوونځيو ته ورسېد.