پوهنې وزارت د ښوونکو او اداري کارکوونکو «۸۱۵۶ پنځم او شپږم بستونه» د یوې مطبوعاتي غونډې په ترڅ کې اعلان کړل
د پوهنې وزارت له لوري د آزموینو ملي ادارې سره په همکارۍ، د ښوونیزو بنسټونو اړوند د ښوونکو او اداري کارکوونکو « ۸۱۵۶ پنځم او شپږم بستونه» په دوو پړاوونو کې د آزادې سیالۍ په موخه د مطبوعاتي غونډې په ترڅ کې اعلان ته وسپارل شول.
په یاده غونډه کې د پوهنې وزارت د کیفیت تضمین معین الحاج مولوي عبدالخالق صادق، د آزموینو ملي ادارې سرپرست الحاج شیخ عبدالباقي حقاني، د پوهنې وزارت ځینو مرکزي رئیسانو او د رسنیو استازو حضور درلود.
د غونډې په پيل کې د پوهنې وزارت د کیفیت تضمین معین د یادو بستونو پر اعلان خوښي څرګنده او ویې ویل، نن هغه ورځ ده، چې د افغانستان.ا.ا. د پوهنې وزارت د قوي رهبرۍ په استازیتوب او د آزموینو ملي ادارې په همکارۍ، د ښوونکو او اداري کارکوونکو اړوند۸۱۵۶بستونه د آزاد رقابت په موخه اعلان ته سپارو، تر څو په پوره روڼتیا سره وړ کادرونه په یادو بستونو کې وګمارل شي.
دغه راز د آزموینو ملي ادارې سرپرست د افغان ملت د تېرو څو لسیزو د بدمرغیو اساسي علت د معیاري ښوونیز نظام نشتوالی وباله او زیاته یې کړه، دا چې د معارف بنیاد جوړول د مسلکي اشخاصو په جذبولو کې دی، له نېکه مرغه اوسمهال د اوسني ښوونیز نظام مشران همدغو ترخو تجربو ته په کتلو ژمن دي، تر څو وړ او بااستعداده کسان د آزاد رقابت له لارې په تعلیمي بنسټونو کې وګماري.
د غونډې په پای کې د پوهنې وزارت اداري لوی رئیس مفتي محمد یوسف ثاقب د یادې غونډې برخه والو ته د ښوونکو او اداري کارکوونکو د بستونو د معیارونو او څرنګوالي په تړاو هر اړخیز معلومات وړاندې کړل.
غونډه دعائیې په لوستلو سره پای ته ورسېده.
