په بلخ ولایت کې د ښوونځي نوې ودانۍ ګټې اخیستنې ته وسپارل شوه
د بلخ ولایت نهرشاهي ولسوالۍ اړوند د فردوسي ښوونځي نوې ودانۍ، د یوې همکارې ادارې په مرسته د ۱۴۱ زره ۷۰۰ ډالرو په لګښت بشپړه او په رسمي ډول د پوهنې چارواکو او سیمه ییزو مخورو په حضور کې پرانیستل شوه.
د بلخ ولایت مرستیال والي محترم مولوي نورالهادي ابو ادریس په خپله وینا کې د پورته ذکر شوي پروګرام د تمویلکوونکو څخه د مننې په ترڅ کې د علم او پوهې اهمیت په اړه هر اړخیزې خبرې وکړې.
د یاد ولایت پوهنې رئیس محترم مفتي محمد شریف عثماني هم تعلیم په ټولنه کې یو مهم او حیاتي بنسټ وباله او ویې ویل: پورته ذکر شوې ودانۍ، چې په دوه پوړونو کې په پاخه او اساسي ډول جوړه شوې ده؛ شپږ درسي ټولګي، شپږ غرفې تشنابونه، د څښاک پاکو اوبو لپاره ژور څاه او نور اړین لوازم لري، چې په پایله کې یې د زدهکوونکو لپاره خوندي او مناسب تعلیمي چاپېریال چمتو شو.
