د پکتیکا ولایت له یو شمېر تعلیمي ادارو سره د ۳.۵ مېلیونه افغانیو مرسته شوې
د پکتیکا ولایت پوهنې ریاست چارواکو په وینا، د روان کال (۱۴۰۴ لمریز) په اوږدو کې تر اوسه پورې، د ارګون ولسوالۍ د والدینو شوراګانو، اوسېدونکو او خیریه ادارو لخوا، د همدغې ولسوالۍ له تعلیمي مرکزونو سره ۳.۵ مېلیونه افغانۍ مرستې شوې دي.
د یاد ولایت پوهنې رئیس محترم مولوي عبدالوکیل خالد د خلکو له همکارۍ ستاینه وکړه او څرګنده یې کړه چې، د پوهنې وزارت هڅه کوي تر څو د شته امکاناتو په پام کې نیولو سره د مدارسو او ښوونځیو ستونزې حل کړي؛ خو د نوموړي په وینا، د خلکو همکاري او ملاتړ د پوهنې د پروسې په پیاوړتیا او معیاري کولو کې مهم رول لوبوي.
