په هرات ولایت کې د څه باندې ۱۰۰ زره ډالرو په لګښت د «واش» پروګرام پروژې بشپړې شوې
د «واش» پروژو چارې، چې پکې د تشنابونو جوړول، د سېپټیک څاهګانو برابرول، د څښاک پاکو اوبو څاهګانو کیندل او د لمریز برېښنا سیسټم نصبول شامل وو، د هرات ولایت زاول ولسوالۍ اړوند په ده میرزا قاسم او ده افغان لېسو کې د ۱۰۶ زره امریکايي ډالرو په ارزښت، د جمعیت هلال احمر افغانی په مالي همکارۍ بشپړې شوې.
د هرات ولایت پوهنې رئیس محترم مولوي رحمتالله جابر، د دغو پروژو له بشپړېدو څخه د خوښۍ په څرګندولو سره وویل چې، د یادو بنسټیزو پروګرامونو پلي کېدو سره د ښوونځیو یو شمېر اساسي ستونزې هوارې او زدهکوونکو ته یې د روغ، خوندي او مناسب تعلیمي چاپېریال زمینه برابره کړې ده.
نوموړي د جمعیت هلال احمر افغانی له همکاریو مننه وکړه او د هرات ولایت په مرکز او ولسوالیو کې د تعلیمي زیربناوو د ښهوالي او پراختیا لپاره د نورو همکارو بنسټونو د مرستو پر جلبولو ټینګار وکړ.
