د هېواد د تودو سیمو او ولایتونو کلنۍ ازموینې پای ته ورسېدې
د پوهنې وزارت د لایحې له مخې د هېواد د تودو سیمو او ولایتونو کلنۍ ازموینې، چې د زمري میاشتې په لومړۍ نېټه پیل شوې وې، پای ته ورسېدې. دغه ازموينې د يادو ولايتونو د پوهنې رياستونو د رئيسانو، آمرینو او د تعلیمي څارنې د غړو په شتون کې په بشپړ شفافيت سره ترسره شوې.
له بلې خوا د يادو ولايتونو له ښوونځيو څخه فارغ شوي زده کوونکي د پوهنې رياستونو د رئيسانو، ولسي مشرانو، ښوونکو، علماوو او د خپلو کورنيو په حضور کې د يو لړ مراسمو په ترڅ کې خپلې فراغت غونډې ونمانځلې.
په دې مراسمو کې د پوهنې مسئولینو له دوی څخه وغوښتل چې خپلو لوړو زده کړو ته دوام ورکړي، ترڅو په راتلونکي کې د روزل شویو علمي او مسلکي کادرونو په توګه د هېواد او هېوادوالو لپاره د ښو خدمتونو جوګه وګرځي.
