د پوهنې وزارت د اسلامي زده کړو معینیت د ښوونیزو بنسټونو د ارزونې پروګرام پیل کړ
د پوهنې وزارت د اسلامي زده کړو معینیت د پرېکړې پر بنسټ، د هېواد په ۲۸ سړو ولایتونو کې د اسلامي زده کړو بنسټونو د ښوونیز وضعیت، د زده کوونکو د علمي کچې، اداري، تدریسي او تعلیمي پروګرامونو د ارزونې او څارنې پروسه پيل شوه.
په همدې موخه د اسلامي زده کړو معینیت د ظرفيتونو د ارزونې رئيس مفتي عبدالولي سداد په مشرۍ مشورتي غونډه جوړه شوه، چې پکې د یاد معینیت د درۍ ګونو رياستونو مسئولینو او آمرینو هم ګډون درلود.
په پیل کې د اسلامي زده کړو معینیت د ظرفیتونو ارزونې رئیس د اسلام سپېڅلي دین له نظره د چارو څارنې او کنټرول اهمیت ته اشاره وکړه او د اسلامي زده کړو بنسټونو پلان او پروګرام یې ګډون والو ته تشرېح کړ.
ورپسې د پوهنې وزارت د ښوونیزې څارنې آمر مولوي ګدا محمد مفلح، د اسلامي زده کړو بنسټونو څارنې او کتنې آجنډا په تفصیل سره بیان او په دې اړه یې د غونډې ګډون والو ته قانع کوونکي ځوابونه ورکړل.
غونډه د یادې موضوع په اړه له هراړخیزو بحثونو، سالمو نظریاتو او وړاندیزونو له تبادلې وروسته، د لازمو تصمیمونو په نیولو سره د افغانستان د خلکو د هوساینې په دعاء سره پای ته ورسېده.
