له مرکز او ولایتونو څخه د پوهنې د کړنو انعکاس
کابل
د پوهنې وزارت د کیفیت تضمین معینیت د څارنې او ارزونې رئیس مولوي غلام ربي رباني، د کابل ولایت له پوهنې رئیس مولوي عبدالحق حقاني سره وکتل.
نوموړي د خپلې کتنې موخه، د کابل پوهنې ریاست له اداري چارو څخه بیا کتنه او څارنه وبلله چې د پوهنې رئیس له لوري یې تود هرکلي شو.
سمنګان
د ملګرو ملتونو د پرمختيايي پروګرام (UNDP) د شمال زون د دفتر رئيس بختيار خان او ورسره مل پلاوي، د سمنګانو ولايت پوهنې رئيس الحاج مولوي نصرت الله فيضاني، سره وکتل.
په دې کتنه کې د يادې ادارې مسئول، د پوهنې په برخه کې د خپلې ادارې د فعاليتونو په اړه د معلوماتو ورکولو ترڅنګ، د سمنګان ولایت په ٢٠ ښوونځيو کې د لمريزې برېښنا د سيستم د فعالېدو په ګډون پر بېلابېلو موضوعاتو خبرې وکړې.
لوګر
په لوګر ولایت کې د "مادران" خیریه بنسټ د ۱۶۰ زره افغانیو په لګښت، د یاد ولایت په محمد آغې ولسوالۍ کې د زرغون شهر د هلکانو لېسې لپاره د څښاک پاکو اوبو څاه برابر کړ.
کاپیسا
د کاپیسا ولایت پوهنې رئیس مولوي محمد فرید حقاني د یاد ولایت په تګاب ولسوالۍ کې د قدرت الله شهید، آقا شیرین شهید، غازي پاینده محمد خان لېسو او خیرالمدارس مدرسې له اداري او تدریسي فعالیتونو څخه لیدنه وکړه او له ښوونکو او استادانو سره یې په جلا جلا توګه وکتل.
هرات
د هرات ولايت پوهنې رئيس مولوي رحمت الله جابر، د یاد رياست له آمرینو او مدېرانو سره وکتل او په ټاکلي وخت سره د خدمتونو په وړاندې کولو او له مراجعينو سره د ښه سلوک په ګډون يې په بېلابېلو مسایلو تفصیلي خبرې وکړې.
په ورته مهال نوموړي له هغوى څخه وغوښتل، ترڅو خپلې دندې د پوهنې وزارت د کړنلارې مطابق د اسلامي ارزښتونو په رڼا کې سر ته ورسوي.
