په فاریاب ولایت کې د یو باب ښوونځي د ودانۍ بنسټ ډبره کېښودل شوه
د پوهنې وزارت چارواکي وايي، د فاریاب ولایت قیصار ولسوالۍ اړوند په غوره کلي کې، چې د یاد ولایت له لرې پرتو کلیو څخه دی، د یو باب ښوونځي د ودانۍ بنسټ ډبره کېښودل شوه.
ټاکل شوې ده، دغه ښوونځی۶ درسي ټولګي، دوه اداري خونې، د اوبو رسولو او لمریزې برېښنا سیسټمونه او نورو اړین ملحقات ولري، چې ۷۰ زره امریکايي ډالره لګښت پرې راځي او د جوړولو مالي لګښت یې د پوهنې په برخه کې د یوې همکارې ادارې له لوري ورکول کېږي.
د فاریاب د پوهنې رئيس الحاج مولوي محمد طاهر جواد په وينا، تر دې وړاندې د يادې ولسوالۍ د اسلام جوی کلي د يو تن علم پروره شخصیت له لوري د ښوونځي لپاره ۴ جرېبه ځمکه وقف شوې وه.
ويناوالو په ټول هېواد کې د ښوونې او روزنې د پراختيا او پرمختګ په برخه کې د پوهنې وزارت د رهبرۍ هڅې وستايلې او د هېواد له پوهنیز نظام څخه يې خپل ملاتړ څرګند کړ.
له بلې خوا د پوهنې وزارت مشرتابه د پوهنې په برخه کې د خلکو له مرستو په ځانګړې توګه د قیصار ولسوالۍ له خلکو څخه د ښوونځي لپاره د ځمکې د ورکړې له امله مننه کوي.
