د غزني ولایت اوسېدونکو د پوهنې په برخه کې له ۱۸ مېلیونو افغانیو څخه ډېره مرسته کړې
د غزني ولایت پوهنې ریاست په یوه مطبوعاتي اعلامیه کې ویلي؛ د یاد ولایت د اوسېدونکو په مالي ملاتړ سره، د ۱۴۰۴ کال په لومړیو نهو میاشتو کې یې د اجرستان، ناور او مالستان په ولسوالیو کې د ۱۸ مېلیونو افغانیو څخه په زیات لګښت اساسي ښوونیزې پروژې پلې کړې دي.
د هغوی د څرګندونو پر بنسټ، په دې درېیو ولسوالیو کې ۴ ښوونځي جوړ شوي، ۷ ښوونځي بیارغول شوي، ۲ دیني مدرسې نوې جوړې او ۱۵ بابه نورو ښوونځیو ته اداري تجهیزات وېشل شوي دي.
همدارنګه، په اجرستان ولسوالۍ کې، ۲ دیني مدرسې د ۱ مېلیون ۵۰ زره افغانیو په ارزښت جوړې او د شمیه شافيخیل دیني مدرسې لپاره یو جرېب ځمکه پېرل شوې ده.
په ناور ولسوالۍ کې، ۴ نوې ښوونځي د ۱۳ مېلیونه ۷۹۳ زره ۵۶۳ افغانیو په ارزښت جوړې شوي، ۳ نور ښوونځي بیارغول شوي او ۱۰ بابه ښوونځیو ته اداري تجهیزات وېشل شوي دي.
په مالستان ولسوالۍ کې، ۴ ښوونځي بیارغول شوي او ۵ ښوونځیو ته اداري تجهیزات ورکړل شوي دي.
د پوهنې وزارت مشرتابه د پورته ذکر شویو پروژو پلي کول د خلکو او پوهنې وزارت ترمنځ د نږدې همکارۍ نښه ګڼي او د پوهنې په برخه کې د غزني ولایت علمپروره اوسېدونکو له دوامداره ملاتړ ستاینه کوي.
