د سمنګان ولایت په پوهنې ریاست کې د "اغېزمن تدریس او موثرې زده کړې " تر سرلیک لاندې ورکشاپ جوړ شو
د سمنګان ولایت پوهنې ریاست کې د ښوونکو د مسلکي پراختیا غړو لپاره د یوې همکارې ادارې لخوا د "اغېزمن تدریس او موثرې زده کړې" په نوم ۹ ورځنی ورکشاپ د یاد ولایت پوهنې رئیس محترم مولوي محراب الدین اقبال په حضور کې ترسره شو.
دغه ورکشاپ د ښوونکو مسلکي پراختیا د ۶۲ غړو او د ولسوالیو د پوهنې آمرینو په ګډون سره تنظیم شو، ترڅو د ښوونکو مسلکي ظرفیتونه لوړ او په ښوونځیو کې د تدریس کیفیت ښه شي.
د پرانیستې په مراسمو کې، د پوهنې رئیس محترم مولوي محراب الدین اقبال ګډون والو ته ښه راغلاست ووایه او د زده کړې اهمیت او د ټولنې په وده او پرمختګ کې یې د علم او پوهې بنسټیز رول په اړه خبرې وکړې او زیاته یې کړه چې د فردي پوهې زیاتوالی او زده کوونکو ته یې په مؤثره توګه لېږدول د یو باخبره او وړ نسل د روزلو اساس دی او کولای شي په راتلونکي کې د ودې او کیفیت لرونکې زده کړې لامل شي.
