د فاریاب ولایت په قیصار ولسوالۍ کې د یو باب منځني ښوونځي نوې ودانۍ پرانیستل شوه
د فاریاب ولایت قیصار ولسوالۍ اړوند د بیرکه منځني ښوونځي نوې ودانۍ، چې رغنیزې چارې یې څه موده مخکې د یو همکار بنسټ په ملاتړ د ۱۹.۹۵ مېلیونه افغانیو لګښت سره پیل شوې وې، د پوهنې مسئولینو، علماء کرامو او د سیمې د خلکو د استازو په حضور کې افتتاح او ګټې اخیستنې ته وسپارل شوه.
د یاد ولایت پوهنې رئیس محترم الحاج مولوي حمیدالله ارشاد، حاضرینو ته په خپلو خبرو کې ډاډ ورکړ چې د پوهنې وزارت رهبري د تعلیمي بنسټونو لپاره د لازم ښوونیزو او روزنیزو امکاناتو او اسانتیاوو برابرولو په برخه کې هېڅ ډول هڅې نه سپموي.
یاده ودانۍ چې په دوه پوړونو کې په اساسي او پاخه ډول جوړه شوې، ۱۳ درسي ټولګي، اداري خونه، لابراتوار، د څښاک پاکو اوبو یو حلقه څاه، احاطوي دېوال، لمریزې برېښنا سیسټم او نور اړین ملحقات لري.
