د فاریاب ولایت په قیصار ولسوالۍ کې د یو باب ښوونځي نوې ودانۍ پرانیستل شوه
د فاریاب ولایت د قیصار ولسوالۍ اړوند آزادکوه لومړني ښوونځي نوې ودانۍ، چې څه موده وړاندې د یوې همکارې ادارې په مالي مرسته د ۲۲ مېلیونه افغانیو په لګښت د ۲۵۰۰ متره مربع ځمکې په ساحه کې چې د بغلان ولایت پوهنې رئیس الحاج مولوي سیدحفیظ الله معتصم بالله له خوا وقف شوې وه، د ودانیزو چارو تر بشپړېدو وروسته، د بغلان او فاریاب ولایتونو پوهنې رئیسانو او چارواکو په ګډون د یو لړ مراسمو په ترڅ کې افتتاح او ګټې اخیستنې ته وسپارل شوه.
د فاریاب ولایت پوهنې رئیس محترم الحاج مولوي حمیدالله ارشاد د علم او پوهې اهمیت ته اشاره وکړه او ویې ویل: د ښوونځیو د ودانیو او ساختماني پروژو جوړول د پوهنې د پرمختګ او د ښوونیز کیفیت لاښه والي په لور یو مهم ګام دی.
ورپسې د بغلان ولایت پوهنې رئیس او د فاریاب ولایت علماوو شورا استازي د موضوع په اړه خبرې وکړې.
د یادونې وړ ده چې پورته ذکر شوې پروژه په دوو پوړونو کې په اساسي او معیاري ډول جوړه شوې، چې ۱۳ درسي ټولګي، اداري خونې، لابراتوار، د لمریزې برېښنا سیسټم، احاطوي دېوال، د اوبو یو حلقه څاه، اړین ملحقات او ۲۳۴ پایې مېزونه-څوکۍ لري، چې په یو وخت کې د شاوخوا ۵۰۰ تنو زدهکوونکو ظرفیت لري.
