د ولایتونو له پوهنې رياستونو څخه څو لنډ خبرونه
پنجشېر
ټاکل شوې ده، چې د پنجشېر ولایت د ۲۰ بابه ښوونځیو ودانۍ د یوې مرستندویه مؤسسې له لوري جوړې او ترميم شي.
د ياد ولايت پوهنې رئيس مولوي غلام ايشان حماس له يادې مؤسسې څخه د مننې ترڅنګ، د چارو له مسئولینو څخه وغوښتل، چې ژر تر ژره د ښوونځيو جوړېدو چارې همغږې او پيل کړي.
لوګر
د پوهنې وزارت د څارنې او ارزونې پلاوي، د لوګر ولایت د پوهنې ریاست د اداري او تدریسي کړنو د څارنې او ارزونې په موخه، ياد ولایت ته سفر وکړ.
ټاکل شوې ده، چې د پوهنې وزارت پلاوی به د یاد ولایت په مرکز او ولسوالیو کې د دولتي او خصوصي ښوونيزو ادارو فعالیتونه هم وڅېړي.
د لوګر ولايت پوهنې رئیس مولوي جنت ګل عزیز، د څارنې بهیر د فعالیتونو د روڼتیا په برخه کې اغېزمن وباله او ژمنه یې وکړه چې یاد ریاست به له پلاوی سره د ارزونې په برخه کې، د آسانتیاوو په برابرولو کې همکاري وکړي.
نورستان
د لوړو زده کړو وزارت پلاوي د کانکور آزموينې د اخيستلو په موخه، نورستان ولايت ته د خپل سفر په ترڅ کې د ياد ولايت په مرکز او ولسواليو کې د پوهنې د آمرانو او کارکوونکو لپاره يو ښوونيز سيمينار جوړ کړ، چې په ترڅ کې يې ښوونکو او د کانکور آزموينې نوماندانو ته د آزموينې د پروسې په اړه لازمې لارښوونې او اصول ور وښودل شول.
پکتیا
د پکتیا ولایت د امرباالمغروف او نهې عن المنکر ریاست مشرتابه، د ياد ولایت د پوهنې ریاست له مسئولینو او کارکوونکو سره وکتل او د شرعي مسایلو په اړه یې ورسره خبرې وکړې.
د يادې ادارې مسئولينو د پوهنې رياست له کارکوونکو وغوښتل، چې خپل ټول شخصي او مسلکي کارونه او مسئوليتونه د اسلامي شريعت په چوکاټ کې تنظيم او ترسره کړي.
همدارنګه، د دغه ولایت د پوهنې رئیس د ښاري پوهنې له آمر سره په ګډه د شهید ملک ابراهیم لېسې څخه لیدنه وکړه او د چارو د ښه والي په موخه یې د يادې لېسې ښوونکو او مسئولینو ته لازمې لارښوونې وکړې.
