د پلټنې عالي ادارې د خپلو څېړنو راپور له پوهنې وزارت سره شریک کړ
هغه غونډه چې د پوهنې وزارت د سرچینو او ادارې په تالار کې جوړه شوې وه، پکې د یاد وزارت د سرچینو او ادارې معین، د تدارکاتو، مالي او اداري رئیسانو ګډون درلود، د پلټنې عالي ادارې خپلې موندنې د وزارت له رهبرۍ سره شریکې کړې.
په پيل کې د پلټنې عالي ادارې استازي مولوي محمد غازي جریر وویل: افغانستان د ټولو افغانانو ګډ کور دی او د.ا.ا.اساسي موخه د کړېدلو افغانانو خدمت دی.
نوموړي د پلټنې د عالي ادارې موندنې له مسئولینو سره شریکې او د ستونزو او نیمګړتیاوو په حل کې یې د همکارۍ غوښتنه وکړه.
د هغه په وينا د دوى موخه، د یاد وزارت د پروژو له پرمختګ څخه کتنه او څارنه، د ياد وزارت په اداري او کاري چارو کې د نيمګړتياوو په ګوته کول او له منځه وړل وو او د پوهنې وزارت له شپږو پروژو د پرمختګ له بهیر څخه يې ليدنه او څارنه وکړه.
په ورته وخت کې د پوهنې وزارت د سرچینو او ادارې معین الحاج مولوي صبغت الله وصیل، د پلټنې عالي ادارې د پلاوي د هرکلي په ترڅ کې ټینګار وکړ، چې له سرغړونکو قراردادي شرکتونو سره به قانوني او اصولي چلند وشي.
نوموړي دغه راز وويل، چې د پلټنې عالي ادارې راپور يې له اړوندو ادارو سره شريک کړى او دوى هڅه کوي، چې شته نيمګړتياوې له منځه يوسي.
له بلې خوا د پوهنې وزارت مالي او اداري رئیس مولوي صدرالدین سعد هم د پلټنې عالي ادارې له راپور څخه مننه وکړه او د یادې ادارې او د داخلي پلټنې ریاست له لوري یې د پروژو پر جدي څارنې ټینګار وکړ.
