د پوهنې له ډګره د نن ورځې خبرونو لنډيز
۱- د کابل ښار اړوند سیدالناصري عالي لېسې لپاره د ۲۱۰ مترو په ژوروالي د اوبو يو حلقه څاه کیندلو او د لمریزې برېښنا د اسانتیاوو برابرولو پروژه، د یوه همکار بنسټ په مالي مرسته د ۲ میلیونه، ۴۰۰ زره او ۲۲۰ افغانیو په لګښت بشپړه او د کابل ښار پوهنې ریاست مسوولینو په حضور کې ګټې اخیستنې ته وسپارل شوه.
۲- د پروان ولایت د شیخ علي ولسوالۍ د صنفي اصولو ۲۵ تنو ښوونکو لپاره د «اغېزمنې زدهکړې او ښوونې ترویج» تر سرلیک لاندې شپږ ورځنی ښوونیز ورکشاپ پیل شو.
د پروان ولایت پوهنې رئیس، الحاج مولوي محمد فرید حقاني، د یاد ورکشاپ د پرانیستې په مراسمو کې د ښوونې او روزنې پر اهمیت او د وړتيا لوړونې پروګرامونو پر ارزښت خبرې وکړې.
۳- د سرپل ولایت سانچارک ولسوالۍ اړوند د ایلنبي کلي د بيبي آمنې لومړني ښوونځي د ودې او پراختیا په موخه، د سیمې اوسېدونکو له لوري ۵۰۰ متره مربع مساحت لرونکې ځمکه وقف شوه.
۴- د کابل ولایت پوهنې ریاست له لوري د وړ، مسلکي او ژمنو کسانو ګومارنې په موخه، د ولسوالیو د پوهنې ادارو اړوندو ۲۹ خالي اداري بستونو لپاره له ۲۱۰۴ تنو غوښتونکو څخه رقابتي ازموینه واخیستل شوه.
۵- د تخار ولایت رستاق ولسوالۍ اړوند په درې بابه ښوونځیو کې د نویو ودانیو جوړولو بنسټ ډبرې د یوې غونډې په ترڅ کې چې د یاد ولایت پوهنې مسوولینو هم پکې ګډون درلود، کېښودل شوې.
