د پوهنې وزارت اسلامي زدهکړو معینیت له لوري د مدرسینو مسلکي پراختیا غړو لپاره سیمینارونه جوړ شول
د پوهنې وزارت اسلامي زدهکړو معینیت له لوري د مدرسینو مسلکي پراختیا غړو علمي وړتیاوو لوړولو لپاره، په کاپیسا او بامیان ولایتونو کې روزنیز سیمینارونه پيل شول.
د پورته ذکر شویو پروګرامونو په پرانیسته کې د پوهنې وزارت دارالعلومونو رئیس محترم الحاج مولوي عبدالقدوس قدوسي، د اړوندو ولایتونو والیانو، علماءکرامو، پوهنې مسئولینو او مدرسینو ګډون درلود.
د اسلامي زده کړو معينیت چارواکو، د یاد روزنیز پروګرام ګډونوالو ته وویل: هغه څه چې په دې سيمينار کې زدهکوئ، ستاسو مسئوليت دى، چې په مدارسو کې يې خپلو استادانو او زدهکوونکو ته ورسوئ.
هغوی زیاته کړه، تاسو باید له خپلو مهارتونو څخه د تعلیمي کیفیت لوړوالي په موخه منظم پلانونه جوړ کړئ، ترڅو تدریسي کیفیت د امکان تر حده لا پسې لوړ او له زدهکړو مهارتونو څخه د طلابو د زدهکړې پروسې ښه کولو لپاره ګټه پورته کړئ.
هېره دې نه وي، چې د سیمینارونو په پای کې به ګډونوالو ته تقدیرنامې هم ورکړل شي.
