د پوهنې وزارت د تشکيلاتو رئيس، د يوه کاري سفر په ترڅ کې سمنګان ولايت ولاړ.
د پوهنې وزارت د تشکيلاتو رئیس مفتي عبدالحلیم حلیمي او ورسره مل پلاوي د سمنګان ولایت پوهنې ریاست د تشکيلاتي چارو د تطبیق او د ښوونيزو ستونزو د حل په موخه سمنګان ولایت ته سفر وکړ.
په پيل کې، د ياد وزارت د تشکيلاتو رئیس، د یاد ولایت د پوهنې له رئیس او نورو کلیدي څانګو آمرانو سره وکتل او د پلاوي د سفر موخې یې له هغوی سره شریکې کړې.
ورپسې د سمنګان ولايت پوهنې ریاست، د نوي تشکيلاتي جوړښت د تطبيق په اړه بحث او د نظرونو تبادله وشوه.
په پای کې د تشکيلاتو رئيس له کارکوونکو څخه وغوښتل، چې په خپلو ورځنيو چارو کې د ياد وزارت ټولې کړنلارې، مقررات او قوانين مراعات کړي او د نظم او اداري د قوانينو په مراعاتولو له مراجعينو سره ښه چلند وکړي.
نوموړي همدا راز د ادارې له مشرتابه وغوښتل، چې د نوي تشکيلاتي جوړښت په پلي کولو کې د کارکوونکو لياقت او وړتيا په پام کې ونيسي او د ګمارنې له بهير څخه په دوامداره توګه څارنه وکړي.
