د پوهنې وزارت د ساینس مرکز او د معیاري آزموینو نوي رئیسان معرفي شول
په هغو مراسمو کې، چې د پوهنې وزارت د مرکزي ادارو رئیسانو، مسئولینو او یوشمېر کارکوونکو پکې برخه اخيستې وه، استاد حبيب الله خالد، د ساينس مرکز د رئیس او مولوي شمس الرحمن حماس د معیاري آزموینو د رئیس په توګه وټاکل شول.
په پيل کې د پوهنې وزارت د ښوونځیو د نصاب او مسلکي ښوونکو د پراختیا لوی رئیس مولوي اول ګل ایوبي، په اداراتو کې تغیر او بدلون د اداري چارو د لاښه والي لپاره یو مهم اصل وباله.
نوموړي د یادو ریاستونو له کارکوونکو او کارپوهانو څخه وغوښتل، چې د اداري چارو په پرمختګ کې له نویو رئیسانو سره همکاري وکړي.
وروسته د تقنین او پالیسۍ رئیس مولوي محمد اسحق حقیقي نویو رئیسانو ته د مبارکۍ ترڅنګ، له هغوی وغوښتل، چې د اداري اصولو په رعایت او همغږۍ کې خپلې دندې پرمخ یوسي.
په پای کې د ساینس مرکز او د معیاري آزموینو رئیسانو، د دیني او عصري علومو پر ارزښت د ټینګار ترڅنګ ژمنه وکړه، چې د یادو ادارو د پرمختګ په برخه کې به له هېڅ راز هڅو څخه ځان درېغ نه کړي.
د يادونې وړ ده، چې تر دې وړاندې استاد حبيب الله خالد د پوهنې وزارت د زده کوونکو د چارو رئیس او مولوي شمس الرحمن حماس د ياد وزارت د بدیلو زده کړو د رئیس په توګه دندې ترسره کولې.
