د پوهنې وزارت د ساینس مرکز رئیس د کابل ښار د یو شمېر ښوونځیو له لابراتوارونو څخه لیدنه وکړه
د پوهنې وزارت د ساینس مرکز رئیس استاد حبیب الله خالد، د یاد ریاست د ساینسي مضامینو له یو شمېر استادانو سره په ګډه، د آریانا (افغان-ترک ښوونځیو اړوند) او د کابل ښار د استقلال لېسو د درسي لابراتوارونو له خونو، وسایلو او اړینو درسي موادو څخه لیدنه وکړه.
نوموړي په يادو لیدنو کې د دغو لېسو له مسئولينو او زده کوونکو سره د مخامخ ناستو تر څنګ، د ښوونکو د تدريسي مېتودونو، درسي لابراتوارونو وضعيت، د لابراتوارونو د موادو او وسايلو د کمښت او نورو اړوندو ستونزو په اړه خبرې وکړې او د هغوی د ستونزو او نیمګړتیاوو د حل په موخه یې مسئولینو ته لازمې سپارښتنې وکړې.
په ورته مهال د يادو لېسو مسئولينو د پوهنې وزارت د ساينس مرکز رئیس له ورتګ څخه هرکلي وکړ او نوموړي ته یې ډاډ ورکړ، چې د هېواد بچیانو د ښوونې او روزنې په برخه کې به تر خپله وسه پوره هلې ځلې وکړي او د معیاري تدریس لپاره به له اساسي تدریسي وسایلو څخه په لاښه توګه ګټه پورته کړي.
