د پوهنې وزارت د سرچینو او ادارې د معین په مشرۍ هیئت د غزني ولایت د اړوندو ولسوالیو له مدارسوڅخه لیدنه وکړه
د پوهنې وزارت د سرچینو او ادارې د معین شیخ مولوي سعیداحمد شهیدخیل په مشرۍ هیئت چې په ترکیب کې یې د یاد وزارت د دارالعلومونو رئیس مولوي عبدالقدوس قدوسي، د تقنین او پالیسي رئیس مولوي محمد رحیم ایوب او د زده کوونکو د چارو رئیس استاد حبیب الله خالد شامل دي، د پوهنې وزارت د مقام له لارښوونې سره سم د غزني ولایت له مدارسو او دارالحفاظونو څخه د لیدنې په ترڅ کې د یاد ولایت د رشیدانو، خواجه عمري، خوګیاڼو، واغظ، اندړ، ګیرو، قره باغ، آب بند او مقر ولسوالیو له دیني مدارسو او دارالحفاظونو څخه لیدنه وکړه. د یادو مدارسو له مسئولینو، استادانو او زده کوونکو سره یې له نږدې ولیدل، د هغوی وړاندېزونه یې واورېدل، له هغوی سره یې خپلې اړینې سپارښتنې شریکې کړي. د یادو مدارسو بشپړه احصایه یې را غونډه او له هرې مدرسې سره یې مالي مرسته وکړه ترڅو ورڅخه د اعاشې، اباتې او ترمیماتو په برخه کې استفاده وشي.
د یاد هیئت مشر شیخ مولوي سعیداحمد شهیدخیل د مدارسو له مسئولینو سره د لیدنې په مهال د هغوی ښوونیز او روزنیز خدمتونه وستایل او یادونه یې وکړه چې د پوهنې وزارت د هیواد د ټولو تعلیمي مراکزو په تیره بیا مدارسو او دارالحفاظونو تمویل او پالنې ته ژمن دی او هڅه کوي چې له یادو تعلیمي مراکزو سره خپلې مادي او معنوي مرستې دوامداره وساتي.
