د پوهنې وزارت د ښوونيز نصاب لوى رئیس بلخ ولایت ته ولاړ
د پوهنې وزارت د نصاب لوى رئیس الحاج مولوي اول ګل ایوبي او ورسره مل پلاوي بلخ ولایت ته رسمي سفر وکړ.
نوموړي د ياد سفر په ترڅ کې د بلخ، سمنګان، فاریاب، جوزجان او سرپل ولایتونو د پوهنې له رئیسانو سره په داسې حال کې وکتل، چې د یادو ریاستونو د مسلکي پراختيا غړو هم حضور درلود.
په پيل کې د بلخ ولایت پوهنې رئیس الحاج مولوي عبدالجلیل شهیدخېل مېلمنو ته د ښه راغلاست تر څنګ، ښوونه او روزنه د ټولنې بنسټ وباله او د پوهنې له ټولو مسئولینو، علماوو او استادانو څخه یې وغوښتل، تر څو د هېواد بچيانو د سالمې روزنې په برخه کې خپلې هڅې لا پسې زیاتې کړي.
ورپسې د پوهنې وزارت د نصاب لوى رئیس محترم مولوي اول ګل ایوبي د خپل سفر موخه، د مسلکي پراختيا د نوي ریاست د کړنلارې پلي کول وبلل او دغه پروګرام يې د ښوونکو د روزنې په نسبت د یو پرمختللي پروګرام په توګه ياد کړ.
دغه راز نوموړي ډاډ ورکړ چې د ښوونکو د مسلکي کولو په پروګرام کې به د تجربه لرونکو استادانو څخه کار واخيستل شي.
نوموړي د ښوونکو د مسلکي پراختيا موخه د بې ځایه لګښتونو مخنیوی او په پوهنيزنظام کې د اصلاحاتو راوستل وبلل.
په پاى كې نوموړي د ښوونکو د روزنې د استادانو او د پوهنې د څارنې د غړو په مناسبو بستونو کې د ټاکلو ډاډ ورکړ.
