د پوهنې وزارت سرپرست د میدان وردګ ولایت د علماءکرامو له آزموینې بهیر څخه لیدنه وکړه
د پوهنې وزارت سرپرست الحاج مولوي حبیب الله آغا چې د ثانويه او مافوق ثانویه مرحلو د آزموینو تنظیم، ترتیب او ارزونې په موخه میدان وردګ ولایت ته تللی، د یاد ولایت د پوهنې مسئولینو او علماءکرامو په ملتیا یې د مدارسو د ط.الب العلمانو له آزموینې بهیر څخه لیدنه وکړه.
د پوهنې وزارت سرپرست د یادو آزموینو څخه د کتنې پر مهال، ګډون والو ته په خطاب کې وویل: الله تعالی هره ورځ موږ او تاسو آزمویي، هر څوک چې په دې آزموینه کې بریالی شي، د الله تعالی د رحمت تر چتر لاندې راځي او څوک چې بې نتیجې شي، هغو ته به یې بدیل ور کړل شي.
نوموړي زیاته کړه: دغه آزموینه ستاسو لپاره د نظام د عالي رهبرۍ له لوري لوی شفقت دی او تاسو باید د دغه ستر نعمت شکر ادا کړئ.
په ورته مهال، د پوهنې وزارت نورو معینانو او یو شمېر مرکزي رئیسانو هم د هېواد په ولایتونو کې د ثانویه او مافوق ثانویه آزموینو بهیر له نږدې وڅاره.
د پوهنې وزارت مشرتابه پلاویو د دغو آزموینو د روڼتیا او عدالت د تامین په موخه مسئولینو او لوړ پوړو څارونکو ته جدي لارښوونې وکړې او له ګډون والو یې وغوښتل چې په بشپړ ډول سره د آزموینې نظم او ډسپلین په پام کې ونیسي.
د يادونې وړ ده، چې د همدغو آزموينو لپاره ټولټال ٣٢ زره کسانو نوم ليکنه کړې وه او د یادو آزموینو لړۍ تېره ورځ (د ١٣٤٦ ه ق کال، رجب المرجب مياشتې په لسمه نېټه) پيل شوه، چې شپږ ورځې به دوام ولري.
