د پوهنې وزارت سرپرست د نیمروز ولایت له والي سره وکتل
د پوهنې وزارت سرپرست الحاج مولوي حبيب الله آغا او ورسره مل پلاوی چې د هېواد په سوېلي ولايتونو کې د ښوونيز وضعیت په ارزونه او څارنه بوخت دی، نن د نیمروز له والي شیخ محمد قاسم خالد سره وکتل او د پوهنیز وضعیت پر محوریت په ځانګړې توګه د یاد ولایت د تعلیمي وضعیت په تړاو یې بحث او نظرونه تبادله کړل.
په دې کتنه کې د نیمروز والي د پوهنې وزارت سرپرست ته د ښه راغلاست ترڅنګ، د دغه ولایت د پوهنیز وضعیت په اړه د وزارت مشرتابه ته معلومات ورکړل، د ښوونځیو او دیني مدارسو پر ستونزو یې د پوهنې وزارت له سرپرست سره خبرې وکړې او د پوهنې وزارت له مشرتابه یې وغوښتل چې د دې ولایت په لرو پرتو سیمو کې هم د خلکو لپاره دیني مدارس او ښوونځي جوړ کړي.
د دې ناستې په دوام د پوهنې وزارت سرپرست نیمروز ولایت ته د خپل سفر موخه، د یاد ولایت د پوهنیز وضعیت هر اړخیزه ارزونه یاده کړه او د نیمروز ولایت مشرتابه ته یې ډاډ ورکړ چې ژر تر ژره به د مدارسو او ښوونځیو شته ستونزې حل کړي.
نوموړي څرګنده کړه، په پام کې لري تر راتلونکي کال پورې په مرکز او ټولو ولسوالیو کې د مدارسو او ښوونځیو لپاره نوې ودانۍ جوړې کړي، چې د پلان له مخې په لرو پرتو سیمو کې هم د دیني مدارسو او ښوونځيو جوړول شامل دي.
