د پوهنې وزارت له لوري هلمند ولایت ته د ۶۰۰ سېټه مېزونو او څوکیو وېش لړۍ پیل شوه
د پوهنې وزارت له لوري د ښوونیزو اسانتیاوو لاپیاوړتیا او د ښوونیزو اړتیاوو حل کولو په موخه، د هلمند ولایت پوهنې ریاست ته د ۶۰۰ سیټه مېزونو او څوکیو وېش لړۍ د یو لړ مراسمو په ترڅ کې پیل شوه.
په یادو مراسمو کې د پوهنې وزارت د سرچینو او ادارې معینیت د خدماتو رئیس استاد حبیبالله خالد، د هلمند ولایت د پوهنې استازي او یو شمېر نورو مسئولینو ګډون درلود.
د پوهنې وزارت د خدماتو رئیس وویل، چې د یاد وزارت له اساسي موخو څخه یو هم تعلیمي مرکزونو ته د ښوونیزو اسانتیاوو برابرول او د زدهکوونکو لپاره د مناسب پوهنیز چاپېریال رامنځته کول دي.
نوموړي زیاته کړه: "د هلمند ولایت پوهنې ریاست لپاره دا ځل ۶۰۰ سېټه مېزونه او څوکۍ ځانګړې شوې، چې د اړتیا له مخې به د مرکز او ولسوالیو اړوندو ښوونځیو ته ووېشل شي."
همدراز نوموړي څرګنده کړه، چې د یادې لړۍ په یوه برخه کې ۵۰ پایې څوکۍ او ۱۰ پایې مېزونه د پوهنې وزارت د ساینس مرکز لابراتوارونو ته ځانګړي شوي، تر څو د ښوونکو او زدهکوونکو د عملي تجربو اړتیاوې پرې پوره شي.
د هلمند ولایت د پوهنې استازي د پوهنې وزارت له دغې پروسې څخه د مننې ترڅنګ څرګنده کړه، چې د یادو مېزونو او څوکیو لېږد به د یاد ولایت د ښوونیز نظام د لامعیاري کېدو او پرمختګ لپاره بنسټیز ارزښت ولري.
