د پکتیا ولایت د عالي دارالمعلمین څخه ۹۷ تنه نجونې فارغې شوې
د پوهنې وزارت_پکتیا: د پکتیا ولایت له عالي دارالمعلمین څخه ۹۷ تنه نجونې فارغې شوې، په همدې مناسبت جوړې شوې غونډې ته د پوهنې رئیس استاد کوچي ځاځي په خبرو کې وویل چې نوموړی تل په دې هڅه کې دی تر څو د مسلکي ښوونکو د کمښت ستونزې حل شي.
نوموړي وویل:زما هڅه همدا ده تر څو مونږ په ټولو ښوونځیو کې رسمي ښوونکي ولرو، دا دی له نېکه مرغه زمونږ ۹۷ تنه زده کوونکې له ۱۴م ټولګي فارغې شوې، چې دا به د ښځینه ښوونکو د کمښت ستونزه تر یوې کچې راکمه کړي.
د پکتیا ولایت د عالي دارالمعلین رئیس فضل الرحمن طارق وویل چې مونږ هر وخت ددوی له زده کړیز چاپیریال څخه څارنه کړې ده او تل مونږ ورته غوره امکانات برابر کړي دي.
د یادولو وړ ده چې د نجونو د زده کړو یاد پروګرام د یونیسیف ادارې په مالي لګښت ترسره شو.
