د یو شمېر ولایتونو د ښوونځیو له زده کوونکو څخه د آزمویښتي معیاري آزموینو اخیستلو لړۍ پیل شوه
د پوهنې وزارت د پلان رئیس مولوي حبیب الله «مؤذن» او ورسره مل پلاوي خوست ولایت ته د رسمي سفر په ترڅ کې، د یاد ولایت اړوند اسماعیل خان مندوزيو ولسوالۍ په خړین عالي لېسه کې د معیاري آزموینو آزمویښتي پروسه پرانیسته، چې ور سره سم په څلورو نورو ولايتونو «بلخ، پروان، هرات او غزني» کې هم دغه لړۍ پيل شوه.
همدارنګه د پوهنې وزارت د کیفیت تضمین معین الحاج مولوي عبدالخالق «صادق» د غزني ولایت پوهنې رئیس او مسئولینو سره په ګډه، په ياد یاد ولایت کې د آزموینو له بهیر څخه څارنه وکړه او زده کوونکو ته یې د علم او پوهې په تر لاسه کولو کې د زیاتو هلو ځلو توصیه وکړه.
په ورته مهال د معیاري آزموینو او ښوونیزو پایلو ارزونې رئیس مولوي شمس الرحمن حماس په هرات، د څارنې او ارزونې رئیس مولوي غلام ربي رباني پروان او د اساسي او ثانوي زده کړو رئیس مفتي محمد یوسف ثاقب په بلخ ولایتونو کې د ذکر شویو آزموینو له پروسو څخه څارنه وکړه.
پوهنې مسئولینو په یادو ولایتونو کې د آزمویښتي معیاري آزموینو له بهیر څخه د لیدنې په ترڅ کې، د هېواد په ښوونیزو بنسټونو کې د معیاري آزموینو په تعمیم سربېره، د عدالت او روڼتیا پر تامین ټینګار وکړ.
د همدغو ولايتونو پوهنې رئيسانو هم د يادې موضوع په اړه خبرې وکړې او زده کوونکي يې وهڅول، تر څو په خپلو درسونو کې نه ستړې کېدونکې هڅې وکړي.
