سرپل ولايت کې د پوهنې ریاست کارکوونکو ته روزنیز ورکشاپ جوړ شو
پوهنې وزارت ، سرپل : سرپل ولایت کې د ښوونځیو مدیرانو ته د کارونو د ارزونې او پلان جوړونې په برخه کې روزنیز ورکشاپ جوړ شو.
د سرپل ولایت د پوهنې رئیس احمد خان بیګزاده د ورکشاپ ګډونوالو ته وویل: په دې ورکشاپ کې به تاسو په عملي او مسلکي توګه د ترسره شويو فعالیتونو د ارزونې او پلان جوړونې په اړه لازمه ښوونه تر لاسه کړئ .هیله مو دا ده، چې د دې ورکشاپ له ګټو نه ښه استفاده وکړئ او د هغو په رڼا کې دندې په سمه توګه ترسره کړئ .
د پوهنې ریاست د عمومي تعلیماتو مرستیال الحاج سید عبدالقادر ایوبي او د ښاري پوهنې آمر حفیظ الله خان عمري هم د موضوع په اړه خبرې وکړې او د دا ډول ورکشاپونو جوړول یې د کارکوونکو د وړتیا لوړونې لپاره مهم وباله.
