له مرکز او ولایتونو څخه د پوهنې لنډ خبرونه
لوګر
د لوګر ولایت د پوهنې رئیس مولوي جنت ګل عزیز په مشرۍ درې کسیزه کمېټه د پوهنې ریاست د ۵. ۶. ۷ او ۸ بستونو د کارکوونکو د یوکلن فعالیت ارزونه وکړه او مستحق کسان یې له امتیازاتو څخه برخمن کړل.
کابل
د کابل ولایت د چهارآسیاب ولسوالۍ د پوهنې او د تعلیمي څارنې آمر د دغه آمریت له کارکوونکو سره د اونیزې ناستې په ترڅ کې د OCCD موسسې له سیمه ییزو استازو سره هم وکتل.
په دې ناسته کې د یادې موسسې استازي د چهارآسیاب ولسوالۍ د ۱۵ ورځني سروې راپور یې له مسوولینو سره شریک کړ او د یادې ادارې د فعالیتونو او راتلونکو کاري پلانونو په باب یې خبرې وکړې.
پکتیکا
د پکتیکا ولایت په ۵ ولسوالیو کې د سویډن موسسې سیمه ییز دفتر د ماشومانو د حقونو، لومړنیو مرستو او ښوونیزې مېتودلوژۍ تر خپل عنوان لاندې د سیمه ییزو او چټکو ټولګیو د ۱۳۲ ښوونکو لپاره ۱۴ ورځنی ښوونیز سیمینار جوړ کړ.
د دغه ولایت د پوهنې ریاست رهبري د دغه ښوونیز پروګرام له ترسره کېدو خوښي څرګنده کړه او د دغه ولایت نورو ښوونکو ته یې د دې پروګرام پر دوام ټینګار وکړ.
فراه
د فراه ولايت د بالابلوک ولسوالۍ د پوهنې آمریت اداري غونډه وکړه او ددغه آمریت له کارکوونکو څخه يې وغوښتل چې د ورځنيو چارو په ترسره کولو کې اداري اصول او اداري مقررات په پام کې ونيسي او د پوهنې د کيفيت د ټينګښت لپاره زياتې هلې ځلې وکړي.
همدارنګه:
د پوهنې وزارت د زده کوونکو د چارو ریاست پلاوي د فراه ولایت د پوهنې له رئیس اختر محمد زعیم سره په کتنه کې د زده کوونکو د ذهني چمتووالی، په ماشومانو کې د خوندیتوب او ځان ساتنې احساس، د نوښتګرو زده کوونکو ټاکل او د نصاب په نورو مهمو موضوعاتو یې معلومات ورکړل.
د دغه ولايت د پوهنې رئيس د يادې کمېټې د پروګرامونو د هرکلي په ترڅ کې د هر راز مرستو ژمنه وکړه.
