له ولایتونو څخه د پوهنې خبرونه
هلمند
د هلمند ولايت د پوهنې رئيس مولوي محمد عوض انصاري د دغه ولايت په مرکز کې د دوو ښوونځيو له ښوونیزو او اداري فعاليتونو څخه څارنه وکړه او د يادو ښوونځيو له زده کوونکو سره يې د ليدنې پر مهال د هغوى ستونزې له نږدې وڅېړلې.
نوموړي دغه راز د يادو ښوونځيو له مديرانو او ښوونکو سره په کتنه کې زده کوونکو ته د باکيفيته زده کړو پر برابرولو ټينګار وکړ.
نورستان
د نورستان ولایت پوهنې ریاست د ا.ا. ا له ۸۰۰ مجاهدینو څخه د سویې ازموینه واخیستله. ویل کېږي چې د دې ازموینې بریالي کسان به په دولسم ټولګي کې شامل شي.
دایکندي
د دایکندي ولایت د پوهنې ریاست او په دغه ولایت کې د یونیسف د سیمه ییز دفتر ترمنځ د همغږۍ غونډه جوړه شوه.
په دې کتنه کې د پوهنې په برخه کې د مرستندویو بنسټونو پر فعالیتونو، په لرو پرتو او اړمنو سیمو کې د سیمه ییزو او چټکو زده کړو د ټولګیو د جوړولو په باب خبرې وشوې.
د دايکنډي د پوهنې رياست مشرتابه د يونيسف او نورو مرستندويه بنسټونو د مرستو د مننې تر څنګ له هغوى څخه وغوښتل چې د پوهنې له رياست سره د ټولو ښوونيزو فعاليتونو په عملي کولو کې مرستې وکړي.
بغلان
د بغلان ولایت پوهنې رئیس الحاج مولوي محمد نور عزیزي د دغه ولایت د ښوونکو د روزنې له عمومي آمر محمد اکبر احمدزي سره په کتنه کې د مرستو د ژمنې په ترڅ کې له هغه څخه وغوښتل چې د میتودیکي او مسلکي زده کړو د کیفیت په برخه کې له محصلینو سره جدي کار وکړي.
پروان
د پوهنې وزارت د اساسي او ثانوي زده کړو د ریاست پلاوي په پروان ولایت کې د پوهنې ریاست د نشراتو د مدیریت کارکوونکو ته او همدارنګه په دغه ولایت کې د یونیسف د سیمه ییزو کارکوونکو لپاره روزنیز سیمینار جوړ کړ.
په دې سیمینار کې د کمېټې د درسي کتابونو د ترلاسه کولو او وېشلو، د کتابونو تخنیکي چک، د پروان ولایت ښوونځیو ته د پوهنې وزارت له لخوا د ۹۸زره ۸۴۹ سوه ټوکه کتابونو د وېش په برخه کې د مشخصو ټیمونو پر جوړولو او د فورمونو پر چمتو کولو روزنه ورکړل شوه.
