له ولایتونو څخه د پوهنې خبرونو ته لنډه کتنه
میدان وردګ
د میدان وردګ ولایت پوهنې ریاست مسئولین وايي: د " کلي" خیریه بنسټ د یاد ولایت په ۲۱ ښوونیزو مرکزونو کې ۸۱۰ تنو ځوانانو او ماشومانو ته د وړیا زده کړو لپاره زمینه برابره کړې ده.
همدارنګه یاد خیریه بنسټ د ذکر شویو ښوونیزو مرکزونو ښوونکو ته میاشتني معاشونه هم برابروي.
لغمان
په لغمان ولایت کې یو خیریه بنسټ د یاد ولایت د پوهنې له ریاست سره د ۱۰۰ کارتنو ښوونیزو توکو او وسایلو مرسته وکړه.
د یاد ولايت پوهنې رياست د یاد خیریه بنسټ له مرستو مننه وکړه او زیاتوي، چې د پلان سره سم به دغه ښوونیز توکي په استادانو او زده کوونکو ووېشل شي.
هرات
د هرات ولايت پوهنې رئيس مولوي رحمت الله جابر د کشک رباط سنګي ولسوالۍ اړوند د نورانیه، مدینة العلوم او خيرالمدراس له مدارسو او د ګلران ولسوالۍ د ګلران او قره باغ له مدارسو څخه ليدنه وکړه.
نوموړي د خپل سفر اساسي موخه، په یادو ولسوالیو کې د مدارسو لپاره د لیلیو جوړول او د ښونیزو ادارو د وضعیت ارزول وبلل.
پنجشېر
د پنجشېر ولايت پوهنې رياست له ٨٧ تنو نوماندانو څخه رقابتي آزموینه واخیسته.
په پام کې ده، هغه کسان چې معیاري نمرې ترلاسه کړي، د یاد ولایت په دارالعلومونو کې به د استادانو په توګه وګمارل شي.
بادغیس
د بادغیس ولایت پوهنې رئیس مولوي محب الله احسان د لیلیه لرونکو مدارسو د جوړولو په موخه د غورماچ او بالامرغاب ولسوالیو ته ولاړ او د یادو ولسوالیو د پوهنې له مسئولینو، دیني علماوو او قومي مخورو سره یې د اړوندو موضوعاتو په تړاو خبرې او نظرونه تبادله کړل.
