په دایکندي ولایت د یوې لېسې د نوې ودانۍ لپاره د بنسټ ډبره کېښودل شوه
د دايکنډي ولايت اشترلی ولسوالۍ د چنګان کلان عالي لېسې د بنسټ ډبره د يو لړ مراسمو په ترڅ کې، چې پکې دیاد ولایت پوهنې رئيس، علماوو، ګڼ شمېر خلکو او د زده کوونکو والدينو ګډون درلود، کېښودل شوه.
ټاکل شوې ده، چې یاده ودانۍ د دوه نیم میلیون افغانیو په لګښت سره د ځایي خلکو له لوري، چې ۸ درسي ټولګي، اداري څانګې او يو شمېر نور اړین ملحقات به ولري، په پاخه او اساسي ډول جوړه شي.
بل خوا د یادې ولسوالۍ د پوهنې دوستو خلکو د چکه جنګان ولسوالۍ د ښوونځي د نوې ودانۍ لپاره ځمکه ورکړه، تر څو د ياد ښوونځی ودانۍ پکې ورغول شي.
د پوهنې رئيس قاري عنايت الله سهار او يو شمېر ديني علماوو په خپلو خبرو کې د اسلامي شريعت له نظره د ښوونځيو او ښوونیزو بنسټونو جوړول يو صدقه جاریه عمل وباله او د یاد ولايت له خلکو يې مننه وکړه.
دغه راز د دايکنډي ولايت د اشترلی ولسوالۍ قومي مشرانو او خلکو د پوهنې رياست رهبرۍ ته د خپلو ستونزو او وړانديزونو د وړاندې کولو پر مهال ژمنه وکړه، چې د پوهنې د پرمختګ او هوساينې په برخه کې به تر خپله وسه پوره همکاري وکړي.
